Nagnubo sang 76 ka mga krimen ukon 19.14% ang una nga tatlo ka bulan sang 2021, kon ikumpara sang nanligad nga tuig, suno sa report sang Bacolod City Police Office.
Humalin Enero tubtob Marso 2021, may 321 ka mga na-record nga krimen ang BCPO. Ini ang manubo kon ikumpara sa 397 ka mga crime incidents sang 2020.
Sa 321 ka mga insidente sini nga tuig, 71 diri ang index crimes kag 250 ang non-index crimes.
Ang index crimes amo ang homicide, murder, physical injuries, rape, robbery, theft, carnapping kag motorcycle theft.
Samtang ang non-index amo ang mga bayolasyon sang special laws, threat kag alarm and scandal.
Ang average nga montly crime rate sini nga tuig ang yara sa 17.49 samtang 21.63 naman ang sang 2020.
Ginalantaw nga nakabulig sa pagnubo sang krimen amo ang mga nagkalain-lain nga police operations, pag-implementar sang Enhanced Managing Police Operations, nalakip na ang implementasyon sang minimum health protocols batuk COVID-19.*
