Naghire ang Department of Finance (DOF) sang serbisyo sang isa ka communications strategist nga gintake down sang Facebook ang mga social media pages bangud sa mga ‘manipulative’ nga aktibidad online.
Sa notice of award nga may petsa June 10, gin-anunsyar sang DOF nga nag-grant ini sang kontrata balor P909,122 sa public relations strategist nga si Nicanor Gabunada Jr.
Epektibo ang kontrata humalin June 16 tubtob Disyembre 15 nga magatugot kay Gabunada nga magserbe bilang DOF communications strategy consultant.
Kinahanglan ni Gabunada maghatag sang research information nga maka-imprubar sang approach sang DOF sa pag-eksplikar sang fiscal policies sa publiko.
Lakip man diri ang pagdevelop sang multimedia communications plan nga magamit sang DOF sa ila sini campaigns kag events pati na ang platform nga makakuha sang engagement.
Dugang pa diri ang paghatag sang monthly evaluation sang performance kag public response sang multimedia releases sang DOF.
Magacoordinate man si Gabunada sa ahensya sa pagpalapnag sini sang media mileage pinaagi sa pagproduser sang materyales para sa TV, radio, print kag digital channels.
Sadtong tuig 2019, ginsingle out sang Facebook si Gabunada bangud sa gina-alegar pag-operate sang kapin 200 ka mga Facebook pages, accounts kag groups nga nalink sa pagpalapta sang disinformation online.
Bangud diri, gin-shut down sang Facebook ang mga pages ni Gabunada sa pagbayolar sang community standards sini.
Base sa imbestigasyon sang Facebook, nag-gasto na ang team ni Gabunada sang indi magnubo sa $59,000 ukon malapit sa P3 million sa pag-manage sang manipulative pages.
Ginpamunuan ni Gabunada ang social media campaign nga nagbulig kay Presidente Rodrigo Duterte nga magdaog sa 2016 presidential elections.
Isa ka marketing executive gikan sa Davao si Gabunada nga nagpamuno sang research and business analysis team sang TV network sang ABS-CBN nga napasira sa idalom sang Duterte administration.
