KABANKALAN CITY – Ginpadal-an sang subpoena sang National Bureau of Investigation (NBI)-Bacolod ang duha ka mga barangay kapitan sa siudad sang Kabankalan bangud sa paghatag sang pahanugot sa operasyon sang iligal nga Small Town Lottery (STL) sa ila mga barangay.
Suno kay Atty. Renoir Baldovino, ang mga ginpadalhan sang subpoena amo sanday Kapitan Joel Alibango sang Barangay 5 kag Kapitan France Leonard Seguero sang Barangay 6.
Dugang pa ni Atty. Baldovino, gilayon sila nga nagpatigayon sang surveillance kag test betting bangud sa nabaton nila nga intelligence report nga may nagapataya sang STL sa siudad, partikular sa Brgy. 5, Brgy. 6, kag Brgy. 7.
Sandig sa ila ginpatigayon nga test betting kag surveillance, nakumpirmar nga positibo nga may nagapataya sang STL sa nasambit nga mga barangay.
Rason nga sang tinalikdan nga Miyerkules, Pebrero 15, 2023, nagpatigayon sang entrapment operation ang NBI-Bacolod nga nagresulta sa pagdakop sa apat ka mga persona.
Ang mga nagkaladakpan amo ang mga bet collector nga ginkilala sanday Reda Ayala, Renante Berioso, kag Janet Pustor kag isa ka manugtaya nga ginkilala kay Glenn Benigay.
Nalakip sa gin-subpoena sang NBI ang gina-alegar mga operator nga sanday alyas “Madam” kag Jay-r Basinillo kun sa diin suno sa affidavit nanday Berioso kag Ayala, diri sila naga-remit sang ila koleksyon.
Ginpahayag pa ni Atty. Baldovino nga nakasaad man sa amo nga affidavit nga sa ginpatigayon nga meeting agud estoryahon ang mga collector kag gina-alegar mga operator, didto ini ginpatigayon sa barangay hall sang Brgy. 6 kaupod sanday Kapitan Alibango kag Kapitan Seguero.
Ginklaro naman ni Atty. Baldovino nga apisar nga kumpirmado ang operasyon sang STL sa Brgy. 5, wala nalakip sa gin-subpoena ang kapitan diri bangud wala ini sa ginpatigayon nga meeting.
Sandig naman sa imbestigasyon sang NBI, bag-o pa lamang nga naga-operate sa nasambit nga mga barangay ang nasambit nga iligal nga STL.
Ginklaro ni Atty. Baldovino nga ang naga-isahanon nga may permiso sang Philippine Charity Sweeptakes Office (PCSO) nga maga-operate sa bilog nga Negros Occidental kalakip sa siudad sang Bacolod amo lamang ang Super Lucky Beagler, Inc. (SLBI) nga may permit nga mag-operate tubtob Pebrero 2024.
Gani, suno kay Atty. Baldovino, tanan nga magapataya sang STL nga indi under sa SLBI ang magakabig nga iligal.
Sa karon, nagapadayon pa ang imbestigasyon sang NBI agud matumod ang financer sang amo nga iligal nga STL operation.
