SAGAY, NEGROS OCCIDENTAL– Dead-on-arrival ang duha ka mga driver sang motorsiklo matapos magbunggo-anay ang ila nga mga motor sa Sitio Bitoon, Brgy. Old Sagay syudad sang Sagay.
Sandig sa imbestigasyon sang Sagay City Police Station, natabo ang aksidente, kagab-i, Lunes, Abril 17, 2023.
Sakay sa Kawasaki Barako 175 ang mga biktima nga ginkilala kay Mark Sabaiton, 29-anyos, driver kag angkas nga sanday Lowie Velotendoz, 23-anyos, Michael Sabaiton, 31-anyos kag si Longie Nazareno, 28-anyos, lunsay mga residente sang Brgy. Old Sagay.
Samtang sakay sa Honda XRM ang ginkilala kay JL Ayco, 26-anyos, residente sang Brgy. Taba-ao, Sagay City.
Suno sa traffic investigation section, padulong sa direksyon sang City proper halin Brgy. Old Sagay ang apat nga sakay sa Kawasaki Barako apang sang pataklad na sila sa kurbada nga dalan, gilayon na lamang nga gin-agaw sang kasugata nga Honda XRM ang ila linya rason sang aksidente.
Bangud sa mabaskog nga impact, nakaangkon sang injuries sa ila tagsa ka mga lawas ang mga biktima, apang si Mark Sabaiton kag JL Ayco ang natam-an gid, nga gilayon gin bawian sang kabuhi, samtang kinahanglan naman nga dal-on sa ospital sa siudad sang Bacolod ang tatlo pa ka mga biktima.*
