Alas 3:30 sang hapon, Hunyo 6 nagtabok ang isa ka iloy upod ang iya 2 anyos kag 5 anyos nga bata sa suba sa bahin sang Purok 6, Barangay La Granja, ciudad sang La Carlota.
Suno kay Rosario Cadenas (iloy), gin-una niya tabok ang iya 2 anyos nga bata sa piyak sang suba kag ginbilin ang iya 5 anyos nga bata sa tunga-tunga kag ginpapwesto sa dako nga bato.
Apang, sang iya na ginbalikan ang 5 anyos nga anak, gulpi lang nagbaskog ang current sang tubig.
Si Nonel Galaura nga nagapamukot sang isda sa iya nga fishpond ang nakabati sang pagkusog sang tubig kag nakabati sang singgitan sang bata.
Hinali ini nga nagpadulong sa suba kag nakita ang mag-iloy nga naga-uyat sa hilamonan upod ang 2 anyos nga bata kag iya ini gilayon ginbutong kag ginpahigad.
Samtang, iya naman nakita sa unhan ang 5 ka tuig nga bata nga nagatungtong sa bato, nagahilibi-on, nagasinggitan sang “mama” samtang naga amat-amat taas ang tubig sang suba.
Hinali man nga may nag-abot nga lalaki nga ginkilala kay Michael Sacudit alyas kaikai nga nagtinguha salbaron ang 5 ka tuig nga bata.
Gindaho sini ang iya kamot sa bata apang, may naglabay nga mga si-it kag pusog nga nag-igo sa kamot sang bata kag nadala ini sang makusog nga current sang tubig.
