Lunsay katapu sang Dawlah Islamiya ang nagkalamatay sa engkwentro nga nagluntad sa banwa sang Bubong, probinsya sang Lanao del Sur, Domingo nga adlaw, Abril 3.
Ginkilala ang mga gin alegar terorista nga nagkalamatay sa engkwentro nga sanday Bashir Marcarangcat, Sowaib Marcarangcat kag Abdulatip Ripag.
Nasamaran naman sa engkwentro ang isa ka miyembro sang Special Action Force okon SAF nga si Police Cpl. Celso Tingcang.
Suno kay Brig. Gen. Allan Nobleza, director sang Police Regional Office-Bangsamoro Autonomous Region, husisaon kuntani sang mga otoridad ang hideout sang grupo, kon bala may mga armas kag iligal nga druga nga ginatago ang mga suspetsado.
Apang, nagkuha sang mga armas kag nagbatu sa mga otoridad ang gin alegar mga katapu sang Dawlah Islamiya.
Yari ang ngalan sang mga naaresto sa operasyon:
• Sultan Macalawan Macarambon Maulana
• Nasrudin Acob
• Salik Maulana
• Anwar Aragon
• Acmali Sarip
• Aslani Ripag
• Saynolla Tigunogon
Nakuha sa hideout sang mga suspeks ang mga masunod:
• Apat ka assault rifles
• duha ka pistols
• isa ka rocket-propelled grenade
• P60,000 nga balor sang shabu
Base sa alegasyon sang mga local executives sa probinsya sang Lanao Del Sur, imbolbado ang naaresto nga mga miyembro sang grupo sa criminal activities, kalakip na sa extortion kag pagbaligya sang mga armas kag explosives.*
