TALISAY CITY – Nagtuga sang kakugmat sa mga estudyante, manunudlo kag staff sang Rafael B. Lacson National High School sa Barangay Zone 12 sa syudad sang Talisay, Negros Occidental ang pagbitbit sang Granada sang isa ka Grade 10 student sini gid lamang nga aga sang Martes, Abril 4, 2023.
Nakuha sa 21-anyos nga estudyante ang isa ka hand grenade, ginasuspetsuhan marijuana buds nga nagabalor P120 kag tooter.
Natabo ang insidente mga las 9:15 sini nga aga.
Nagreport sa Talisay City Police Station ang trisikad driver nga si Rolando Dionson matapos ini ginpahog gamit ang granada sang estudyante nga ginkilala kay Bronson Lucas Lacson samtang ini sila ang yara sa Petron Gasoline Station.
Nagresponde ang SWAT personnel apang si Lacson ang yara na sa sulod sang RBL.
Nagpakig-angut ang SWAT kaupod ang complainant sa security guard sang buluthuan kung sa diin positibo nga gin-identify si Lacson.
Sang ginrikisa si Lacson, nakuha sa iya ang mga kontrabando.
Gin-turnover na sa Crime Laboratory ang granada, suspected marijuana kag tooter.
Suno sa adviser ni Lacson nga mabuot man nga bata si Lacson kag okay man sa klase.
Gindugang pa sang adviser nga damo ang nakakita nga may dala sang granada si Lacson kag nakita man sang iya mga classmate nga ara sa iya sulod bag ang explosive.
DEAD DROP
Suno kay Lacson, gin-dead drop lang sa iya ang granada. Gin-chat niya lang sa Facebook ang isa ka dummy account nga may granada bangud nanamian siya kag ini ang gin-dead drop sa iya.
[Meaning of dead drop – a method of espionage tradecraft used to pass items or information between two individuals using a secret location.]
Ginkadtuan ni Lacson ang lugar nga ginbilinan kag ginkuha ang granada nga iya nabakal sa balor nga P1,000.
Ginapanginwala ni Lacson nga may ginpahog ini nga trisikad driver apang iya gin-ako nga may granada kag marijuana siya.
Gin-ako sini nga nagagamit siya sang marijuana para kunsumo lang apang wala siya nagabaligya.
Pahayag pa ni Lacson nga gamiton niya ang granada para depensahan ang iya kaugalingon.
Suno pa sa iya nga mga duha na katuig sa iya ang granada halin sang pagsugod sang pandemic.
Sang ini ang ginpamangkot kung ano kuntani nga kurso ang iya pagakuhaon sa kolehiyo, ang iya sabat — Criminology.
Nagpakilala si Lacson nga siya si Raul Magsaysay kag ang iya edad 18-anyos pa lamang.*
CLASSES SUSPENDED
Gin-suspend naman ang klase sa nasambit nga eskwelahan samtang wala pa na-clear ang lugar.
Ginahulat pa ang EOD sang Negros Occidental Police Provincial Office.
MULTIPLE CHARGES
Suno kay P/Lt. Abegail Donasco, public information officer sang Talisay City Police Station, posible magapangatubang sang kaso nga paglapas sang Republic Act 9516 para sa explosives kag RA 9165 para sa recovered marijuana.
Magluwas pa ini sa inisyal niya nga violation nga grave threat bangud sang pagpahog sa trisikad driver, suno kay Donasco.
Ang RA 9516 ukon illegal possession of explosives ang non-bailable ukon wala sang piyansa para sa temporaryo nga kahilwayan sang suspek.
Wala man nag-resist si Lacson kag tigayon man nga narekober sang kapulisan ang granada sa ibabaw nga bahin sang iya singit kag nakapkapan sang marijuana nga nagabug-at sang isa ka gramo sa iya bulsa, suno kay Lt. Donasco.
Medyo may tuktok na ang granada nga nakuha kay Lacson apang bilang standard operating procedure, suno kay Donasco, ginpatawag ang Explosive Ordnance Division agud mag-conduct sang clearing operation sa area.
Ginapreparar na ang mga dokumento para sa pagpasaka sang kaso via inquest proceeding batuk kay Lacson.*
