Yara sa Phase 1 sang clinical trial sa Amerika ang na-imbento nga posible bulong batuk sa brain cancer nga nadiskubre sang isa ka neurosurgeon nga doktor nga may dugo nga Pilipino.
Ginatawag nga OS2966 ang nasambit nga bulong nga ginhimo ni Dr. Shaw Carbonell sa California.
Ginpaathag ni Carbonell, safety trials pa lang ang pagahimuon sa Phase 1 sang clinical trials agud mahibaluan kun luwas gamiton sang pasyente ang bulong.
Gindunga pa niya nga kinahanglan nga makumbinisi ang FDA ukon Food and Drug Administration sang US nga luwas ang bulong agud maipadalum ini sa Phase 2.
Sa Phase 2, ila pagalantawon kun ano kadamo sang bulong ang pagamiton sa pasyente kag hibaluon man kun makabulig ini sa pasyente nga may brain cancer.
Nangin inspirasyon ni Carbonel ang iya mga nangin pasyente nga may cancer sa paghimo sang posible nga bulong sa cancer.
via GMA
