SILAY CITY – Gindakop ang isa ka manugbaligya sang isda matapos ini nakuhaan sang ginasuspetsuhan shabu sa ginpatigayon nga buy-bust operation sa Silay City Public Market las-4:15 sang hapon sang Martes, Disyembre 6.
Ginkilala ang suspetsado nga si Renato Espinosa, 37-anyos nga fish vendor, residente sang Sitio Dapdap Tuburan, Brgy. Lantad, sa nasambit nga siudad, kag ginakabig sang kapulisan bilang isa ka street level individual (SLI).
Base sa report sang Silay City Police Station, nakumpiskar sa suspek ang duha ka daku nga mga putos kag 11 ka sachets sang ginasuspetsuhan shabu nga ginabulubanta nagabug-at sang 15 ka gramos kag nagabalor sang P102,000.
Yara na ang suspek sa kustodiya sang Silay CPS kag magapang-atubang ini sang kaso sa paglapas sa Republic Act 9165 ukon ang Comprehensive Dangerous Drugs Act of 2002.