Nabilib ang publiko sa isa ka food delivery rider nga ginsulong ang baha agud madul-ong lamang ang order sang iya kustomer kag wala pa sini ginbaton ang tip para sa iya serbisyo.
Nagahingyo naman ang kostumer nga si Don Sarino sa Food Panda nga dapat hatagan sang pasidungog ang rider nga si Michael John Grulla.
Sandig sa Facebook post, ginsaysay ni Don Sarino nga matapos siya mag-order paagi sang Food Panda gilayon na lamang nga nagbubo ang mabaskog nga ulan.
Nag-order si Don Sarino, nga taga-Mandaluyong, sa Circuit Makati rason kun ngaa nakahibalo ini nga madamo nga baha ang ma-agyan sang rider pakadto sa ila kag gina-ekspektar na niya nga ma-delay ang order.
Matapos ang 30 ka minutos, nagtawag si Grulla kag ginhambal nga naglakat na lamang siya kag ginsulong ang baha nga nagdangat na ang kataason sa tuhod.
Tuman man ang pagpangayo sang pasaylo sang rider sa iya kustomer bangud na-delay ang pag-deliver sang food order.
Apang mas nabilib pa ang kustomer sang wala ginbaton sang rider ang iya ginhatag nga tip para sa serbisyo sini.
“Swerte padin pala ako kasi hindi ko need gawin yung ginawa ni Kuya para sa delivery fee & service. Nakakatuwa lang din na may mga ganitong Rider padin talaga na mahal yung trabaho nila & walang hinihingi na kapalit.
Minsan kasi kapag yung gusto natin sa buhay hindi natutupad, naiisip natin na para saan tayo nagssacrifice? Na parang napagiiwanan na tayo ng mundo not knowing na may mas nahihirapan pa bukod satin. Totoo nga na porke nahihirapan na tayo minsan sa buhay, it doesn’t mean na madali na para sa iba.” pahayag ni Don Sarino.*
