Wala madakpan ang gina-alegar riding in tandem nga tuyo kuntani kawaton ang cellphone sang isa ka lalaki sa Barangay Taloc, syudad sang Bago sadtong Lunes, Nobyembre 14.
Sa interview sang Radyo Bandera kay PMSgt. Erwin Jamandre sang Bago PNP, posible nga indi residente sang nasambit nga syudad ang mga suspetsado.
Sandig sa Facebook post sang utod sang biktima, takna las 7:25 sang gab-i sang magapauli na ang iya manghod sa ila balay sa nasambit nga barangay kag bangud sa kadalumon sang dalan, gingamit sini ang flashlight sang iya cellphone.
Nakibot ang biktima sang hinali na lang nga gin-snatch sang riding in tandem ang iya nga cellphone.
Sang magapalagyo na kuntani ang mga suspetsado, aksidente nga nabuy-an nila ang cellphone kag maswerte nga wala na nila ini ginbalikan pa.
Gilayon naman gin-report sang biktima sa kapulisan ang nagluntad nga insidente agud maghatag sang paandam sa publiko.
Base sa panaysayon sang biktima, nagasuksok sang longsleeve nga bayo ang duha ka niwangon nga suspetsado, sakay sila sang motorsiklo nga nagaduag itom, nga wala sang plate number kag nagapiraw-piraw ang headlight sini.
Suno kay Jamandre, naglibot ang ila nga patrol sa ginluntaran sang insidente kagab-i tubtob mag-aga kag wala nila nakit-an ang mga suspetsado.
