BACOLOD CITY– Dismayado ang amay sang babayi matapos mahibalu-an nga kinawatan ang idik nga gindala sang lalaki sa balay sang babayi agud sagudon kag ihanda sa maabot nga kasal.
Suno sa amay, indi niya masyado kilala ang nobyo sang iya anak bangud naga-obra ini bilang helper sa Barangay Mansilingan, Bacolod City.
Ginpahayag sang amay nga wala sila kabalo nga kinawatan ang gindala nga idik sa ila balay.
Dugang pa sang amay, nagahatag ang iya anak nga babayi sa lalaki para ibakal sang idik agud itigana kuntani sa kasal sa maabot nga Enero, 2023.
Tuman naman ang kaakig nga nabatyagan sang amay sa nobyo sang iya bata bangud sa kahuy-anan nga ginhatag sini sa ila pamilya.
Suno naman sa stepmother sang babayi, indi sila magpasugot nga dayunon ang kasal apang kun gusto sang magnobyohanay nga mangin sila sa ulihi, indi magpakita ang ginikanan sang babayi.
Dugang pa sang stepmother, sadtong bulan sang Agosto, may gindul-ong man nga baboy ang lalaki sa balay nila apang ginkuha ini sang tag-iya upod ang kapulisan sang Bago City.
Nagapangabay naman ang ginikanan sang babayi nga indi sila pag-husgahan bangud wala sila kabalo sang ginhimo sang lalaki.
Matandaan nga ginkuha sang kapulisan sang Bago kaupod ang tag-iya ang kinawatan nga idik sa Barangay Tangub, Bacolod City.*
