Pabor si Governor Eugenio Jose Lacson nga ibalik sa orihinal nga schedule ang school calendar sa pagbukas sang klase sa bulan sang Hunyo kag pagtakop sang klase sa bulan sang Marso.
Ini ang reaksyon sang Gobernador sa suhestiyon ni Senador Sherwin Gatchalian nga ibalik sa bulan sang Marso ang bakasyon sang mga buluthuan.
Suno kay Lacson sa tuman nga kainit sang panahon kag may ginapaabot pa nga El Ninño, nagakaangay nga ibalik ang bakasyon sa summer season.
Dugang pa sang Gobernador, apektado ang mga kabataan sa tuman kainit sa sulod sang mga classrooms apisar nga ginakonsiderar man sang Dep Ed ang modular kag online classes.
Pahayag pa ni Lacson, mas maayo nga i-take advantage na lamang ang summer sa iban nga mga aktibidad kasubong sang sports kag iban pa nga hilikuton para sa mga estudyante.
Ginpahayag pa sini nga kinahanglan sang mga kabataan ang insakto nga pahuway kag ienjoy ang bakasyon apang indi nila ma-enjoy ang bakasyon bangud natalana ini sa tig-ululan.
Madumduman nga suhestiyon ni Sen. Gatchalian nga ibalik ang schedule sang klase sa nakaandan, matapos nga may 100 ka mga estudyante nagikan sa Gulod National High School Extension ang na-ospital matapos malipong sa ginpatigayon nga fire drill sadtong tinalikdan nga Marso 24.
Suno pa sa Senador, mas maayo nga ibalik ang bakasyon sa summer season bangud ini ang tion nga maka-bonding ang bilog nga pamilya kag ang bulan sang Hulyo kag Agosto ang tig-ululan na.
Sa press statement sang Dep Ed, hugot ini nga ginapanindugan nga wala sila sang plano nga ibalik sa bulan sang Abril kag Mayo ang bakasyon sang mga kabataan apisar sang tuman kainit nga panahon.
Suno kay Dep Ed Spokesperon Michael Poa, ginatugyan nila sa mga school heads sang tagsa ka mga buluthuan ang desisyon sa pag-cancel ukon pagbaylo sa alternative teaching sa tagsa ka mga buluthuan.
Bukas naman ang Dep Ed nga magbaton sang suhestiyon kag nagpasalig nga pagatun-an kun pwede nga ibalik ang summer vacation sa bulan sang Marso matapos nga naliwat ang school calendar tuga sang pandemic nga COVID-19.*
