Nabun-an ang 24-anyos nga lalaki matapos nga magtambag sa inaway sang iya tatlo ka mga tiyo sa Sitio Bungyod, Barangay Cabacungan, banwa sang La Castellana, takna las 4:45 sang hapon, Miyerkules, Nobyembre 1, 2023.
Ginkilala ang biktima kay John Mark Genton y Escanlar, kasado samtang ginkilala naman ang suspek kay Ramon Escanlar y Samulde, 59-anyos, lunsay mga residente sang nasambit nga lugar.
Base sa report sang La Castellana Municipal Police Station, nagluntad ang inaway sa tunga sang tatlo ka tiyo sang biktima nga ginkilala kanday alyas “Bundot”, Jaime kag Ramon.
Gilayon naman nga nagtambag ang biktima sa nasambit nga inaway kag aksidente ini nga nabun-an sa tiyan sang iya tiyo nga si Ramon gamit ang patalom.
Gindala ang biktima sa Rural Health Unit sang La Castellana apang ginsaylo naman ini sa isa ka ospital sa siudad sang Bacolod agud mas mahatagan pa sang nagakaigo nga medikal nga atensyon.
Yara naman sa kustodiya sang La Castellana MPS ang suspek para sa nagakaigo nga disposisyon.*
