Nakabaton sang bomb threat ang isa ka empleyado sang Hall of Justice (HOJ) sini nga adlaw sang Martes, Abril 6.
Suno sa report, nakabaton sang tawag ang isa ka staff sang Public Attorney’s Office gikan sa isa ka persona nga nagpabalo nga may yara sang ginbilin nga bag nga may bomba sa sulod sang HOJ.
Gilayon nga nagtawag sa mga otoridad ang mga empleyado kag nagresponder ang detection team pasado alas 8 sang aga.
Pahayag ni Plt. Remant Benobo, team leader sang bomb squad, malapit duha ka oras ang clearing operation nga ginpatigayon sang detection team antes makumpirmar nga wala sang bomba sa palibot sang HOJ.
Paga-imbestigahan man sang otoridad ang mga numero nga gingamit sa pagpamahog.
Sa karon ginpabalik na sa sulod sang Hall of Justice ang mga empleyado.
