Nagpasalamat si IATF Chief Implementer General Mel Feliciano sa dedikasyon kag kapisan nga ginhatag sang mga cluster leaders kag staff sang Emergency Operations Center sa tanan nga intervention program sa tunga sang pandemya.
Bangod sini, ginpaatahg ni Gen. Feliciano sa exclusive interview sang Radyo Bandera ang tanan nga mga responsibilidad sa nagkalain-lain nga cluster nga ginabug-usan sang Emergency Operations Center.
Ang Date Management Cluster ang nagakolekta sang impormasyon ilabi na ang data halin sa Molecular Laboratory sa diin, ginakuha ang mga results kag ginahatag sa nagkalain-lain nga cluster.
Ang Contact Tracing amo ang nagarelay sa mga Punong Barangays agud e-preparar ang mga positive cases agud makipagkita sa mga contact tracers para sa isa ka interview sa diin, ginahibalo kong sin-o ang ila mga nakasalamuha.
May Facility Cluster man nga nagamonitor sa mga pasyente sa mga hospital kag Patient Monitoring nga nagahatag sang feedback sa EOC angot sa status sang pasyente.
Ang Logistics naman ang nagahatag sang ayuda sa mga apektado nga mga pamilya sang lockdown sa sulod sang 14 ka adlaw.
May Testing Cluster man nga nagalista sang mga contact tracers sa mga close contacts kag may Swabber Cluster man nga amo ang nagakadto sa Barangay kag nagapatigayon sang testing.
May Monitoring Cluster man para sa mga business establishments agud monitoron kong may yara sang mga transmission sa mga establisyemento.
Ini man ang nagapamatood nga tuman ka systematized ang Emergency Operations Center nga gintukod sang Bacolod City sa pagpakigbato sa COVID-19.
Sa piyak nga bahin, ginpalayag man ni General Feliciano nga madamo nga anggulo ang iya ginplano sang ini ang nag-abot sa Bacolod City sa diin, iya ginpokusan ang pagpasangkad sang molecular laboratory, data collection kag Bed Capacity sa mga ospital.
Dugang pa sini nga bangod man sa bulig sang DOH-7 sa Bacolod, napadasig ang pagkuha sang real time data sang COVID-19 kada adlaw.
Samtang, gindugang pa ni General Feliciano nga madamo naman ini sang mga LGUs sa probinsya sang Negros Occidental nga gina-engganyo nga magtambong sa orientation sang EOC agud mapakita ang operasyon sini sa pagpakigbato sa COVID-19.
Isa man ka prebilihiyo nga mag-obra sa tunga sang krisis kag mangin isa ka troubleshooter suno kay General Feliciano sa pagpakigbato sang COVID-19 sa Bacolod.
