Ginapatutokan ni Pangulong Ferdinand Bongbong Marcos Jr., sa tanan nga mga Regional Peace and Order Councils (RPOCs) Chairman ang Political Violence kag problema sa iligal nga druga sa bilog nga pungsod.
Ini ang ginkumpirmar ni Negros Occidental Governor Eugenio Jose Bong Lacson nga amo man ang Chairman sang RPOC-Western Visayas nga ginmandu-an sila ni PBBM sang sila ang ginpatawag sa Malacañang sadtong adlaw nga Martes, apang wala sang may gintumod nga specific nga lugar ang pangulo.
Natalana nga pagakuhaan sang update sang Gobernador si Police Regional Office (PRO) – 6 Regional Director B/Gen. Leo Francisco agud mahibaluan ang sitwasyon sa bilog nga Western Visayas.
Gusto hibaluon sang Gobernador ang sitwasyon sang Peace and Order sang rehiyon agud mahatagan sang kasigurohan nga mangin malinong kag matawhay ang palaaboton nga Barangay kag SK Elections.
Nahibaluan nga ang bag-o nga schedule sa pag file sang Certificate of Candidacies (COCs) ang gintalana sa maabot nga Agosto 28 tubtob Setyembre 2, 2023.
Magasugod naman ang campaign period humalin Oktubre 19 tubtob Oktubre 28.
Sa pihak nga bahin, damlag lang nagpaguwa sang report ang PRO-6 nga may anum ka wala ginhingadlan nga mga elected officials sa Western Visayas ang nakabaton sang pagmahug sa ila kabuhi.
Ini ang ginalakipan sang apat ka mga opisyales sa provincial government sang Iloilo kag duha gikan sa Negros Occidental.
Suno sang PRO-6 gina assess na karon sang mga station commander ang security threat sa 4 ka mga alkalde kag 2 ka bise-alkalde.
Ginpabakod ang mga security measures para sa mga elected officials matapos nga ginpatay si anay Negros Oriental Governor Roel Ragay Degamo kag 8 ka mga sibilyan sa Pamplona Massacre sadtong tinalikdan nga Marso 4.*
