Naarestar ang tatlo ka mga mangunguma sa Gujarat, India sa ilegal nga pagbaligya sang makahulubog nga ilimnon bangud sa mga nahubog nila nga buffalo.
Pagsaysay sang police official nga si Dilipsinh Baldev, nakabaton sila sang tawag sa isa ka veterinarian halin sa isa ka mangunguma nga nagsiling nga pinasahi ang giho sang ila mga buffalo kag nagabula ang ila baba.
Gin-inspeksyon sang veterinarian ang ginasudlan sang ilimnon sang mga buffalo kag nadiskubrehan niya nga naglain ang duag kag baho sang tubig sini.
Nahibaloan nga nacontaminate ang tubig bangud nabuka ang mga botilya sang mga moonshine nga gintago sang mga mangunguma kag nagtagas sa gina-imnan sang mga buffalo.
Mataas ang alcohol content sang moonshine nga nangin ilegal ang produksyon kag pagbaligya sini sa madamo nga pungsod.
Gilayon nga ginsugid ini sang mga veterinarian sa mga pulis nga nagpatigayon sang raid sa farm kag nakarekober sang 100 nga botilya sang alkohol.
Ginadumilian ang pagbaligya, pagbakal kag pagsaylo sang alkohol sa Gujarat, ang home state ni Prime Minister Narendra Modi.
Posible mapreso ukon pagamultahan sang dako ang mapamatud-an nga naghimo sini.
