Nagapati ang iloy sang 17-anyos nga dalagita nga indi lang isa ka 16-anyos nga suspetsado ang nagbuno-patay sa iya anak sa Brgy. Cabacungan, La Castellana, Negros Occidental, las 7:30 sang aga, Disyembre 5, 2022.
Suno sa iloy sang biktima, sa kadamuon sang pilas nga naangkon sang iya anak, indi lang ini ginhimo sang isa ka suspestado. Nahibaluan pa nga ang suspek kag biktima ang magpakaisa kag lunsay mga babaye.
Sandig sa interview sang Radyo Bandera sa iloy sang biktima, takna las 10 sang gab-i sang may nagtawag nga miyembro sang DSWD sa iya kun diin ginapamangkot sini kun nakapauli na ang iya anak sa ila nga balay.
Ginsiling pa ang DSWD nga ang kapulisan na lamang ang bahala nga maghambal sa iya kun ano man gid ang natabo.
Nagasalig naman ang iloy nga magapauli ang iya anak sa ila nga balay bangud masami ini nagahapit sa computer shop nga nahamtang sa likod sang ila nga balay.
Gindugang pa sang iloy, nakit-an niya ang patrol car sang La Castellana nga nagapakadto-pakari sa ila bangga, sa unhan sang ila balay kag didto na siya ginkulbaan.
Bangud sa isa pa lamang ka semana matapos niya ginbun-ag ang iya ika-apat nga anak, ginsugo niya ang iya manghod, kag suno diri nakitan niya ang nagakulob nga lawas sang iya hinablos nga wala na sang kabuhi.
Suno kay P/Capt. Rhojn Darrell Nigos, hepe sang La Castellana Police Station, ginsugat sang suspek ang biktima sa computer shop kag ginhagad niya ini magkadto sa malingwin nga lugar bangud may nagpangita sa iya.
Didto na nagluntad ang komprontasyon kag komosyon sa tunga sang duha bangud lamang sa chismis kag bangud sa kaakig, gintampa kag ginbuno-buno sang suspek ang biktima.
Ginpahayag naman sang iloy nga bangud sa kahisa ang motibo sa pagpatay sa iya nga anak, apang indi sini matumod kun ano nga sahi sang hisa ang ginhalinan sang krimen.
Nagsungka naman ang suspek sa mga otoridad, apang una ini nagkadato sa iya nga amay kag nangayo sila sang bulig sa kapulisan sang La Castellana kag didto na nila nakit-an ang bangkay sang dalagita.
Gindugang pa ni Nigos, nakaangkon ang biktima sang madamo nga buno sa iya nga likod, kilid kag liog nga posible gintunaan sang iya kamatayon.
Magluwas sa mga buno, nakita man nga naghubag kag may samad ang nawala nga mata sang biktima rason nga ginapatihan sang mga kapulisan nga ginkastigo ini antes ginpatay.
Ginpahayag ni Nigos nga wala pa nila narekober ang kustilyo nga gingamit sa krimen, apang ginatinguhaan pa nila nga makita ini bangud madako ini nga bulig para sa pagpasaka sang kaso sa suspek.
Base naman sa panaysayon sang mga residente sa lugar, matapos nagluntad ang krimen, gilayon nga ginhaboy sang suspek ang kutsilyo sa pangpang sang suba nga malapit sa lugar.
Suno La Castellana Police, ginalantaw pa nila kun may kaupod ang suspek nga duha pa ka kalalakinhan kag indi pag-inchindihanay kag madaan nga hiligut-anon ang motibo sa krimen.
Posible nga magapangatubang sa kaso nga murder ang suspek.
(NOTE: Hungod nga gintago ang pangalan sang imbolbado sa krimen bangud lunsay mga menor de-edad ang mga ini)
