Nagapakig-angut na ang Department of Justice (DOJ) sa International Police Organization (INTERPOL), agud mahibaluan kon diin nga bahin sang kalibutan si Negros Oriental Representative Arnolfo Teves.
Sa report sang Pilipino Star Ngayon, ginpaathag ni DOJ secretary Crispin Remulla, nga ang pagpakig-angut sa INTERPOL kabahin pa sang trabaho sang National Bureau of Investigation (NBI).
Wala sa gihapon matumod ni Remulla kon diin nga bahin sang kalibutan si Teves sa pihak sang nagalapta nga impormasyon nga yara ang kongresista sa Cambodia.
Si Teves ang ginatudllo kag ginhingadlan sang DOJ nga mastermind sa pagpatay kay Negros Oriental Governor Roel Degamo.
Nagpamalibad si Teves sa pagbalik sa Pilipinas, apisar sang panawagan sang gobyerno nga magpauli kag atubangon ang kaso.
Antis ginluthang si Degamo sa Pamplona, Negros Oriental sang tinalikdan nga Marso 4, nagpadulong na si Teves sa Amerika agud magpaidalum sa stem cell transplants.*
