Dakup ang isa ka karga-tapas nga nagapakuno-kuno nga “sexy” sa social media apang isa gali ka gin-alegar hold-upper, sa ginpatigayon nga entrapment operation sa Crossing Gaston, Barangay Punta Mesa sa banwa sang Manapla, Negros Occidental, takna las 6:50 sini nga gab-i, Abril 13.
Wala lang anay ginpapangalanan ang suspek, nga taga Barangay Tortosa sa Manapla, pending sa pagpasaka sang kaso sa iya buwas nga adlaw, Abril 14, sandig sa report sang Negros Occidental Police Provincial Office.
Ang modus sang suspek amo ang pagpakuno-kuno nga isa siya ka maanyag nga babayi sa Facebook kag iya sini gina-timptar ang mga biktima, ginahingyo nga mag-meet up sa iya, kag dayon i hold-apon samtang ginatutukan sini sang armas luthang.
Nakuha sa mga suspetsado ang duha ka sachets sang ginasuspetsuhan shabu, duha ka live ammunition sang caliber .38, isa ka empty shell, isa ka cellphone nga may charger kag isa ka sports sling bag.
Yara karon sa paghinakop sang Manapla Police Station ang suspetsado.*
