Ginluthang-patay ang isa ka pulis sa Hacienda Caridad, Barangay Patun-an, Calatrava kagab-e, Pebrero 27.
Ginkilala ang biktima kay PSSG John Daniel Gotera Nillama, 37 anyos, may asawa, naka-assign sa Toboso Municipal Police Station, residente sang Barangay Buluangan, San Carlos City.
Base sa pagpangusisa sang Radyo Bandera, pasado alas 9:30 kagab-e, nagamaneho ang biktima sang iya motorsiklo sang ini ang ginbangga-an sang itom nga pick-up kag gintiro sang maka-duwa ka beses sang gunman nga naigo sa iya ulo nga nagresulta sang iya hinali nga kamatayon.
Nahibaluan man nga nagpadulong ang biktima sa nasambit nga lugar matapos sini ginbisita ang iya nga uma ukon duta.
Base naman sa interview sang Radyo Bandera kay Police Major Roberto Indiape Jr. sang Calatrava PNP nga antes pa man gin-assign sa Toboso Municipal Police Station ang biktima, na-assign ini sa Calatrava PNP sadtong 2018 kag 2019.
Dugang pa ni Indiape nga on going ang imbestigasyon sang kapulisan angot sa insidente kag sa indentity sang gunman kag ang mga kaupdanan sini sa itom nga pick-up.
Nahibaluan man nga may mga pamahog na sa kabuhi sang biktima antes pa natabo ang pagpatay sa iya bangod madamo naman ini sang nadakpan sa bahin sang Calatrava kag Toboso angot sa iligal nga droga.
Suno kay Police Major Indiape nga isa ka dedikado nga pulis kag nakapokus sa trabaho si PSSG John Daniel Gotera.
