Nagpanghatag sang sapatos ang Premier Volleyball League All Filipino Conference Most Valuable Player nga si Jia De Guzman sa lunsay volleyball players sa Malitbog Elementary School volleyball team sa Calinog, Iloilo.
Si De Guzman ang isa ka setter sang Creamline Cool Smashers nga nagdala sang kadalag-an sa team.
Dose tanan ka pares sang mga sapatos ang ginbaton ni Rodolfo Go Villaruz, founder sang Gametime Sports sa Iloilo City.
Sadtong Sabado de Gloria, Abril 8, ginpahibalo ni Villaruz ang Fastbreak nga magahatag sang mga sapatos kag sports bag si De Guzman kaupod ang iya bana.
Nangin viral sa social media ang nasambit nga buluthuan matapos naghampang ang team sa Division of Iloilo Sports Council Meet 2023 nga wala sang sapin sa tiil.
Ang team ang maga-representar sa probinsya sang Iloilo sa palaabuton nga Inter-Division Meet sa bulan sang Mayo.*
