Padayon pa nga gina-trace sang kapulisan ang Mitsubishi Mirage GLX 2016 model nga may plate number FAA 7738 nga salakyan sang isa ka councilor sa ciudad sang Bago, Negros Occidental, nga amo ang gingamit sang duha ka mga lalaki nga gin-alegar nagkastigo kag nagkawat sang iya nga gamit sa isa ka motel sa ciudad sang Bacolod.
Suno kay Lt. Andy Ofalia, deputy station commander sang Station 2 nga siya ang naga-drive sang iya salakyan sa 18th-Lacson Street sang ini ang ginparahan sang duha ka mga lalaki, nga gulpyada man nagsakay kag may dala nga ice pick.
Ginsaysay sang 47-anyos nga councilor sa iya blotter report nga ginpwersa ini nga magdrive padulong sa isa ka motel, kon sa diin sang nag-abot sila didto, siya ang ginkastigo kag ginkuha ang iya nga mga gamit nalakip na ang iPhone Pro Max nga nagabili P50,000, wallet nga may mga unod nga IDs kag P7,000 nga cash.
Antes ini sila naggwa kag gin-drive ang salakyan sang konsehal.
Natabo ang nasambit nga insidente takna las 3:45 sang hapon, Mayo 26 apang ang opisyal ang nagreport sa kapulisan sini lang nga adlaw, Mayo 28.
Ang isa ka suspek nga ginkilala kay alyas “Jun,” ang nagataas sang 5’4” kag nagasuksok sang ballcap, face mask, itom nga t-shirt, shorts kag sapatos, samtang ang isa naman ang 5’6” ang kataason kag nagasuksok man sang kalo, face mask, delargo kag t-shirt.
Mga hubin pa ang mga suspetsado, suno kay Ofalia.
Pakadto kuntani ang konsehal sa Bacolod agud magbakal sang mga kinahanglanon sa iya negosyo.
May mga lagob sa guya kag gisi sa dulunggan ang konsehal, suno kay Ofalia.
Gindugang pa ni Ofalia nga gina follow-up pa nila sa karon ang natabo kag gina-trace kon diin na ang salakyan sang konsehal.*
