Nagdangat na sa masobra 14,000 ang kaso sang dengue nga narekord sa Western Visayas sumugod sadtong Enero 1 tubtob Disyembre 3, 2022.
Sini nga tuig, yara sa 18,803 ang kaso sang dengue sa Region 6 matapos nga marekord ang 87 ka bag-o nga kaso sa Morbidity Week sa 48 ukon sumugod sadtong Nobyembre 27 tubtob Disyembre 3.
Sandig sa datus sang Department of Health Western Visayas, mas mataas sang 516% ang kaso nga narekord sini nga tuig kumparar sa 2,402 nga kaso sadtong 2021.
Nagapanguna ang Negros Occidental nga may kaso nga 5,319; ginsundan ini sang Iloilo Province nga may 2,909; Antique nga may 2,558; Iloilo City nga may 1,054; Bacolod City nga may 915; Capiz nga may 912; Aklan nga may 780; Guimaras nga may 317 kag may 3 pa nga narekord humalin sa nagkalain-lain nga rehiyon.
Kalabanan sa mga may balatian nga dengue ang may edad nga 1 tubtob 10-anyos.
Nagdangat naman sa 82 ang kabilugan sang nagkalamatay bangud sa dengue sa bilog nga rehiyon.*