TALISAY CITY, NEGROS OCCIDENTAL – Pilason ang isa ka miyembro sang Civilian Volunteer Organization (CVO) matapos aksidente nga matiruhan ang kaugalingon sa Vista 1, Brgy. Matab-ang, siudad sang Talisay las otso kagab-i sang Domingo, Pebrero 26.
Ginkilala ang biktima nga si Joel Leomillo, 46-anyos, may asawa, kag residente sang nasambit nga lugar.
Base sa imbestigasyon sang Talisay City Police Station, ginatinluan sang biktima ang iya pusil sa iya puluy-an sang gina-alegar aksidente sini nga napitik ang gato ukon trigger.
Suno sa biktima, sa salog sini ginpa-atubang ang punta sang pusil apang nag-‘ricochet’ ang bala pakadto sa iya dughan.
Gindala ang biktima sa Corazon Locsin Montelibano Memorial Regional Hospital.
Ginsurender naman sang bata sang biktima ang kalibre .45 nga armas-luthang nga may isa ka magazine, upod ang isa ka slug kag isa ka ‘deformed’ nga basiyo sang bala.
