CADIZ CITY – Nadakpan sa akto ang isa ka lalaki nga tuyo kuntani mangawat sa isa ka boarding house sa San Eusebio Subdivision, Brgy. Zone 2, siudad sang Cadiz las-12:30 sang kaagahon sang Lunes, Enero 30.
Ginkilala ang suspetsado kay Jose Maria Peñosa, 28-anyos, kag residente sang Don Salvador 1, Brgy. Tinampaan, sa nasambit man nga siudad.
Base sa report sang Cadiz City Police Station, kuhaon kuntani sang suspek ang lima ka mga cellphone sang nagakatulog nga mga biktima.
Apang nabatyagan ini sang mag-utod nga sanday Jesson kag Jonnel Bariga nga lunsay naga-arkila sa boarding house.
Nakastigohan ang suspek nga nagresulta sa mga bun-og sa nagkalain-lain nga mga bahin sang iya lawas.
Gindala ang suspek sa Cadiz City Emergency Clinic antes gindala sa kustodiya sang kapulisan para sa nagakaigo nga disposisyon.
