“Guilty.”
Ini ang nangin sentensya sang korte sa Caloocan City sa duha ka mga pulis nga responsable sa pag torture sa duha ka mga teenagers nga sanday Carl Angelo Arnaiz kag Reynaldo “Kulot” de Guzman.
Guilty man sa akusasyon nga pagtanom sang ebidensya nga druga kag armas ang duha ka mga pulis sa Caloocan agud ipagwa sa report nga nagagamit sang druga kag nagbatu sa kasuguan si Arnaiz.
Si PO1 Jeffrey Perez amo ang responsable sa duha ka separado nga counts sang pag torture kay Carl Angelo Arnaiz kag Reynaldo Kulot de Guzman, subong man sa pagtanom sang marijuana, shabu kag revolver, bilang ebidensya batuk sa duha ka mga biktima.
Agosto 17 tuig 2017, sang gindeklarar missing sanday Arnaiz kag de Guzman.
Agosto 28 sang masapwan ang bangkay ni Arnaiz sa isa ka funeral parlor sa Caloocan city nga may madamu nga igo sang bala.
Matapos ang isa ka bulan, nasapwan naman ang bangkay ni de Guzman sa isa ka creek sa Gapan, Nueva Ecija nga may 25 ka mga pilas tuga sang pagbuno sa biktima.
Base sa alegasyon sang kapulisan, nang hold up ang 19 anyos nga anay estudyante sang University of the Philippines nga si Arnaiz kag napatay sa “shootout”.
Apang, ginpalayag sang witness nga si Arnold Perlada nga iya nakita si Arnaiz nga ginposasan sang mga pulis sang kaagahon sang Agosto 18,2017.
Nakit-an man si Arnaiz nga nagaluhod kag naga alsa sang iya mga kamot sa atubang ni PO1 Perez kag nagapakitlooy nga nagasiling nga “susuko na ako”, antis ini ginluthang sang pulis sang tatlo ka beses.
Ang pulis nga si PO1 Ricky Arquilita, amo naman ang nagkuha sang posas sa mga kamot ni Arnaiz kag nagbutang sang armas luthang sa isa ka kamot sang biktima antis ini nga ginpalupok sang makaduha ka beses.
Ginpamatbatan sang “reclusion perpetua” okon pagkabilanggo sa tubtub 40 anyos ang suspek nga si PO1 Perez.
Nabawian naman sang kabuhi ang pulis nga si PO1 Arquilita samtang ginapatigayon ang trial.*
