Ginbawian sang kabuhi ang 38-anyos nga lalaki matapos ginbuno sang iya kaugalingon nga amay sa syudad sang San Carlos, Pangasinan sang Martes, Oktubre 18.
Natukiban ang duguon nga lawas sang biktima nga si Sammy de Guzman sa sulod sang ila nga balay sa Barangay Bolosan sa nasambit nga probinsya.
Gindala sa ospital ang biktima apang gindeklarar ini nga dead on arrival.
Nagsungka sa kapulisan ang suspek nga si Salvador de Guzman, 68-anyos.
Suno sa kapulisan, yara sa impluwensiya sang makahulubog nga ilimnon ang suspek kag ang biktima sang matabo ang krimen.
Gina-alegar nga may madugay na nga hiligut-anon sa isa kag isa ang mag-amay.
Suno sa suspek, ginsaysay ni Police Major Rommel Sembrano, chief investigator sang San Carlos City Police Station, nga ginabasol siya sang iya anak sa pagkamatay sang utod sini.
Nakuha sa ginluntaran sang insidente ang kutsilyo nga gingamit sang suspek sa pagpangbuno.
Ginpasakaan naman sang kaso nga parricide ang suspek.
via GMA
