Ginpamatbatan sang Japanese court sini nga Lunes, Setyembre 12 sang 1 ka bulan nga pagkapriso kag ginsuspendido sang tatlo ka tuig ang lalaki nga nagbilin sa duha ka mga lapsag sa iya balay sa Hokkaido sa Japan sa kapin tunga ka adlaw agud magkadto sa pachincko parlor, nga nagresulta sang pagkamatay sang 4 ka bulan nga baby.
Sadtong bulan sang Hunyo, ginbilin ni Mitsuhiro Abe, 35-anyos kag iya dalagita nga asawa ang mga anak sini nga 2-anyos nga lalaki kag 4 ka bulan nga lapsag nga wala sang bantay sa ila nga balay sa syudad sang Kushiro.
Suno sa Kushiro District Public Prosecutors, nasapwan ang 4 ka bulan nga lapsag nga wala na sang kabuhi kag nahibaluan nga “sudden infant death syndrome” ang gintunaan sang kamatayon sini.
Sa trial, ginpahayag sang defense team ni Abe nga ginamonitor sini ang mga lapsag pinaagi sa “remotely controlled camera” nga nakabutang sa ila nga balay apang wala sini sa gihapon nasalabar ang 4 ka bulan nga lapsag sa kamatayon.
Sang bulan sang Enero, ginkasal si Abe kag ang iya asawa nga “biological mother” sang duha ka lapsag kag nagbulaganay sila matapos magluntad ang insidente.
Gindala naman ang asawa ni Abe sa Family court sadtong bulan sang Hulyo bangud sa kapareho nga kaso agud ipaidalum sa supervisions.
