Matapos wala ginsabat ang nagapangaluyag nga kaupod sa trabaho, ginkakibot sang babayi nga ginluthang-patay sini ang iya nobyo.
Base sa anunsyo sang San Mateo County District Attorney sang Setyembre 16, 2023, nahibaluan nga ‘guilty’ ang suspetsado nga ginkilala kay Kevin Prasad, 37-anyos nga anay airport staff, sa kaso nga first-degree murder.
Ginkilala naman ang biktima sa kay Mark Mangaccat, nobyo sang crush ni Prasad nga si Thandar Seinn.
Madugay na nga updanay sa trabaho sanday Prasad kag Seinn sa San Francisco International Airport kag madugay na man nga luyag sang suspek nga magkarelasyon sila sang babayi.
Apang gina-basted ni Seinn si Prasad bisan makapila ka bes na ini nanghagad mag-“date.”
Sang Abril 2018, sang mahibaluan ni Prasad nga nagaplano sanday Seinn nga magsaylo sa Los Angeles, ginbantayan ni Prasad ang magkahagugma sa ila garahe.
Didto nagpalupok si Prasad sang lima tubtob anum ka bes samtang naga-park sang salakyan ang mga biktima nga nagresulta sa kamatayon ni Mangaccat.
