BACOLOD CITY– Positibo sa drug test ang lalaki nga nadakpan kag naghublas sa isa ka buy-bust operation sa syudad sang Silay, Negros Occidental, sadtong Oktubre 30, 2022.
Base sa live report sang Wanted Sa Radyo ni Raffy Tulfo, gin-interview sang team ang pamilya sang nadakpan nga si Jezrel Diaz, 24-anyos kag ang hepe sang Silay City Police Station nga si Police Lieutenant Colonel Mark Anthony Darroca.
Ginpahayag sang pakaisa ni Jezrel nga si Justin Piolino nga updanay sila ni Diaz nga nagpangutang sang softdrinks kag sigarilyo apang may nagpalapit sa ila nga walo ka lalaki kag ginkuha ang cellphone ni Diaz kag gin-kuga ini.
Didto na natabo ang narekord sa viral video sang buy-bust kag madamo ang nag-bash sa kapulisan nga nag-aresto kay Jezrel sa alegasyon nga “planted” ang narekober sa iya.
Suno naman kay P/Lt. Col. Darroca, ang nakita sa video amo ang pagkatapos na sang transaksyon sang police poseur-buyer kay Diaz.
Ang nasambit nga buy-bust ang ika-tatlo na ka attempt sang Silay Police apang sang ikaduha nila nga transaksyon wala nagpakita si Jezrel sa poseur-buyer.
Antes matabo ang buy-bust, nag-coordinate ang hepe sa kagawad sang Barangay Hawaiian, Silay kag sa Philippine Drug Enforcement Agency (PDEA) agud may back-up sa pag-aresto kay Diaz.
Apang wala naman si Darroca nag-ccordinate sa chairwoman sang Barangay Mambulac, Silay agud indi maglapta ang impormasyon sa pagahiwaton nga buy-bust.
Kapin 20 ka metros ang kalayuon nga kuha sang body cam sa transaksyon sang police poseur-buyer kay Diaz.
Sadtong Hunyo 27, 2019 naaresto si Diaz sa paglapas sa kaso nga Republic Act 9165 ukon Comprehensive Dangerous Drugs Act of 2002, apang nagbayad ini sang piyansa sadtong 2021.
Pagapasakaan naman sang kaso si Diaz buwas nga adlaw, Nobyembre 2 sa paglapas sa kaso nga R.A. 9165 Section 5 (sale of drugs) kag 11 (possession of drugs) suno kay Darroca.
Bangud nagpositibo man ini sa pag-usar sang iligal nga droga, dugang nga Section 15 (use of drugs) sang R.A. 9165.
