Liwat nga nadakpan sa ginpatigayon nga drug buy-bust operation sang Bacolod City Police Station 6 ang isa ka lalaki nga makaduha na ka beses napriso may kaangtanan sa paghupot kag pagbaligya sang iligal nga druga sulod sang isa ka pension house sa Brgy.31 Bacolod City sini gid lamang nga aga.
Ginkilala ang subject sang operasyon nga si alyas “Pato”, 35–anyos kag residente sang Prk. Cereza 2 Brgy. 27 Bacolod City.
Suno kay Police Major Leo Estopa, hepe sang Police station 6, ila ginpatigayunan sang monitoring ang subject bangud nahibaluan ginabulubanta isa ka bulan na ini nga nagatinir sa pension house kag nagasaylo-saylo lang sang kwarto.
Kaina sang aga, positibo ini nga nabaklan sang mga otoridad kag nakuhaan pa ini sang 12 ka sachets sang suspected shabu nga ginabulubanta nagabug-at sang 3.5 grams kag nagabili sang more or less P20,000.
Nahibaluan nga sang tuig 2013 una ini nadakpan sa pagbayolar sang RA 9165 apang nakagwa ini.
Liwat naman ini nga nadakpan sa amo man sa gihapon nga kaso sang 2019 apang naka-avail ini sang plea bargaining agreement.
Dugang pa ni Estopa, diri lamang sa Bacolod nagakuha sang items ang suspect kag ginabaligya sa iya mga parokyano nga nagakadto sa amo nga pension house ukon sa mga indibidwal man mismo nga nagarenta didto.
Si Alyas Pato ang liwat magapangatubang sang kaso nga pagbayolar sa sec 5, kag 11 sang RA 9165.
Samtang, magakoordinar naman si Estopa sa tag-iya sang nasambit nga pension house kag i-refer sa lokal nga pamunuan para sa nagakaigo nga pagtsekyar.
