BACOLOD CITY– Ginpangunahan nanday Mayor Salvador Bading Escalante Jr., Vice Mayor Lilia Decolongon, mga Sangguniang Panlungsod nga sanday Lalen Lamis, John Vincent Escalante kag iban pa nga mga City Officials ang paglunsar sang Las Pintas Coffee Table Book kag ang pinaka una nga isyu sang local newspaper nga “Saganak”.
Ginhiwat ang aktibidad sa pavilion sang siudad sa Panaad Park and Stadium sa Barangay Mansilingan, Bacolod City, sini nga adlaw, Huwebes, Abril 20, 2023.
Suno kay Mayor Escalante gindihon ang nasambit nga Coffee Table Book agud mapakita sa bilog nga kalibutan ang resulta sang ginpatigayon nga CASAMA painting competition kun sa diin makita sa amo nga libro ang masobra 400 ka mga paintings nga ginalakipan sang mga artists nga nagikan sa Cadiz, Sagay kag Manapla.
Ang cover photo sang libro amo ang nagdaug sa ginpatigayon nga CASAMA painting competition sang tinalikdan nga tuig, 2022 nga masterpiece sang Cadiznon Local Artist nga si Earl John Salcedo kun sa diin yara subong sa Maynila nagapaidalom sa training sang siudad sang Cavite nga kabahin sa iya nabaton nga premyo bilang grand winner.
Ang mga paintings ang may tema nga kahilabtanan sa Nature, Kabataan, Harvest kag Vendors nga nagapakita sa kultura kag kabuhi sang mga pumuluyo sang Segundo Distrito.
Ang mga nagkalain-lain nga mga paintings ang nahamtang karon sa pavilion sang siudad sa Panaad Park and Stadium.
“Enjoy these compilation of God’s works from our Casama Artist,” ini ang mensahe ni Mayor Escalante sa kada indibidwal nga nakabaton sang amo nga libro.
Kadungan sa ginlunsar amo ang pinakauna nga isyu sang local newspaper nga “Saganak.”
Suno kay Mayor Escalante, ang “Saganak” amo ang pagtabo sang fresh water kag salt water kun sa diin diri masami naga puyo ang madamo nga mga isda kasubong sang tilapya, pasayan, bangrus kag iban pa nga mga aquatic resources.
Nahibalu-an nga isa sa may dako nga kontribusyon agud matapos ang Coffee Table Book kag Saganak amo ang kolumnista sang Panay News kag Column of the Year winner sang 10th Global Media Excellence Award nga si Erwin “Ambo” Delilan.*
