Nagahilibion ang 39-anyos nga lending coordinator matapos ini gin-holdup sa sulod sang iya balay sa Urban Phase 4 (Tumoy), Barangay Rizal, siudad sang San Carlos, Negros Occidental, takna la 1:03 sang hapon kahapon, Nobyembre 6.
Suno sa biktima nga si Rosalie Villanueva nga nag-withdraw siya sang kwarta nga nagdangat sa masobra 70,000 para magamit sa operasyon sang iya natuo nga mata.
Pag-abot niya sa ila balay, gina-alegar nga may nagbayad pa sa iya nga costumer sa lending.
Matapos niya makuha ang bayad, gilayon na lamang nagsulod sa iya balay ang duha ka wala pa makilal-an nga suspek kag ginsumbag sa tiyan ang biktima.
Matapos sumbagon ang biktima, gingapos sang mga suspek ang iya mga tiil kag kamot kag gin-gaid ang iya ulo sa haligi sang double deck bed.
Ginbusalan man sang mga suspek ang bibig sang biktima agud indi na ini makasinggit para mangayo sang bulig.
Apang, nasalbar lamang ang biktima sang nag-abot ang iya menor de edad nga anak kaupod ang iya hinablos nga lalaki nga lunsay gikan sa Palawan Pawnshop nga nagkuha sang sang kwarta.
Bangud sa sitwasyon sang biktima, nagsinggit ang iya anak kag didto na nahibaluan sang mga kaingod balay nila nga ginkawatan sila.
Ginahibalo pa sang mga otoridad kun sin-o ang responsible sa insidente.*
