BINALBAGAN, NEGROS OCCIDENTAL – Patay ang mag-amay sa banwa sang Binalbagan Negros Occidental matapos nga luthangon sang ila mismo nga himata kahapon nga adlaw alas 9:00 sang aga Hulyo 19,2020.
Sa exclusive interview sang Radyo Bandera Patrol Team kay Police Major Fernando Somblingo Jr hepe sang Binalbagan Municipal Police Station, nagluntad ang insidente sa Sitio Nasanagan, Barangay Bi-ao kon sa diin nagahulat kon tani ang mag-amay sang mabakal sang ila nga baboy sang hinali ginpalapitan sang apat ka mga suspetsado kag gilayon nga gintiro sa ulo ang amay nga ginkilala kay Crisanto Espante Sr 52-anyos, gintiro patay man sang mga suspek ang 22-anyos nga si Crisanto Espante Jr.
Bangod sa patal nga igo sang ginapatihan calibre 45 nga armas luthang lunsay dead-on the- spot ang mga biktima.
Sa piyak nga bahin ginkilala ang mga suspek nga sanday, Jomar Salvador 25-anyos kag si alyas Negro Salvador, hinablos sang biktima ang bata mismo sang iya nga utod kag alyas Junjie 30-anyos kag isa pagid ka wala makilan-an nga suspek.
Nakita mismo sang 15-anyos nga bata sang biktima ang natabo nga amo man ang nakakilala sa mga suspek.
Sa dugang nga imbestigasyon nahibaloan nga nag-umpisa sa pagpatu-patu sa pamilya sang biktima nga ginhiwitan sini ang amay sang mga suspek nga napatay matapos nga maghabok ang tiyan sini, umpisa sadto suno kay Lorena asawa kag Iloy sang biktima nagdumot na sa ila ang mga himata.
Sa piyak nga bahin nakapalagyo naman ang mga suspetsado kag padayon nga ginapangita sang mga kapulisan.
Ginalauman nga magapangatubang sang kaso nga Murder suno sa Binalbagan PNP ang mga suspek kung ang mga ini ang mapamatbatan na sang korte matapos nga handa magpasaka sang kaso ang pamilya sang mga biktima.
