Patay ang mag-asawa matapos mabungguan sang pick-up ang ila ginasakyan nga motorsiklo sa National Highway sang Purok Masinadyahon, Brgy. Lag-asan, siudad sang Bago, Negros Occidental las-12:30 kaina sang kaagahon, Huwebes, Oktubre 5, 2023.
Sa interview sang Radyo Bandera kay Police Lieutenant Colonel Jay Malong, hepe sang Bago City Police Station, ang mga biktima ang ginkilala nga amo sanday Benjie Siasico y Nuangay, 47-anyos, kag Mary Joy Siasico y Demapula, may anum ka mga kabataan, lunsay mga mangunguma kag mga residente sang Purok Balatong Brgy. Pacol, Bago City.
Base sa imbestigasyon sang mga otoridad, nabungguan sang Toyota Hilux conquest pick-up nga ginamaneho sang 22-anyos nga College Student ang ginasundan sini nga motorsiklo kun sa diin sakay ang mag-asawa.
Suno kay Malong, ginaalegar sang College Student nga hinali lang nagpatunga ang motorsiklo rason nga iya ini nabungguan apang indi pa ini makumpirmar sa karon bangud nga wala sang iban nga witnesses sa lugar kag wala man sang CCTV.
Dugang pa sang hepe, wala sang sinyales ukon napanimahuan nga naka-inom ang driver sang pick-up sang matabo ang aksidente.
Nakahunong karon ang College Student sa Bago PNP kag natalana nga ipaidalom sa drug test.*
