BACOLOD CITY– Patay ang isa ka lola apang injured naman ang iya apo matapos ginbunggu-an sang isa ka motorsiklo sa Barangay Magballo, Kabankalan City, Negros Occidental kahapon, Martes, Nobyembre 29.
Nagluntad ang aksidente takna las-9:30 sang aga.
Ginkilala ang mga biktima sanday Lily Genova, 81-anyos kag si Daniel Genova, 4-anyos kag residente sang nasambit nga barangay.
Samtang ginkilala naman ang suspek kay Carl David Daniel, 18-anyos kag residente sang Barangay Bantayan, Kabankalan City.
Sang nagatabok sa dalan ang mag-lola, nadula-an sang kontrol ang suspek kag nabunggu-an niya ang mga biktima.
Gilayon gindala ang mag-lola sa Kabankalan City Hospital apang ginbawi-an si Lily sang kabuhi kag injured naman ang iya apo.
Yara naman sa kustodiya sang kapulisan ang suspek kag magapangatubang sa kaso nga reckless imprudence resulting in homicide.*
