Arestado ang magbayaw sa ginpatigayon nga buy-bust operation sa Purok Nasuok, Sitio Cubay, Barangay Guinhalaran, siudad sang Silay, takna la 1:20 sang hapon, Lunes, Oktubre 9, 2023.
Ginkilala ang mga nadakpan sanday Michelle Oftana y Flores, 24-anyos, ginakabig nga Street Level Individual kag Joshua Junsay, 21-anyos, ginakabig nga Newly Identified Drug Personality, lunsay mga residente sang siudad sang Silay.
Base sa report sang Silay City Police Station, nakuha sa mga suspetsado ang anom ka pakete sang ginasuspetsuhan shabu nalakip na ang buy-bust item nga ginabulubanta nagabug-at sang 14 ka gramos kag nagabalor sang P95,200.
Nahibaluan nga live-in partner ni Oftana si Jack Garocho nga isa sa tatlo ka mga nadakpan nga suspek nga imboldado sa robbery hold-up sa isa ka gasoline station sa Silay City sadtong Oktubre 4, 2023.
Nakahunong karon sa Silay CCPS ang magbayaw nga magapang-atubang sa kaso nga paglapas sa Republic Act 9165 ukon Comprehensive Dangerous Drugs Act of 2002.*
