Malapit P130K nga ‘shabu’ nakumpiskar sa buy-bust sa Manapla

MANAPLA – Nagadangat sa P129,200 ang bili sang ginasuspetsuhan shabu nga nakuha sa ginpatigayon nga buy-bust operation sa Hacienda San Pablo, Brgy. San Pablo, banwa sang Manapla sini lamang nga Huwebes, Abril 20.

Base sa report sang Manapla Municipal Police Station, nakumpiskar ang anum tanan ka pakete sang ginasuspetsuhan shabu takna las says sang gab-i.

Ginkilala ang suspetsado sa kay Ronilo Basco, alyas Taronron, 45-anyos nga residente sang nasambit nga lugar.

Ginabulubanta nagabug-at sang 19 ka gramos kag nagabalor sang P129,200 ang nakuha nga iligal nga droga.

Gindala ang suspek sa nasambit nga police station kag nagapang-atubang ini sang kaso sa paglapas sa Republic Act 9165 ukon ang “Comprehensive Dangerous Drugs Act.”