Patay ang isa ka mangunguma sang ini ang ginluthang patay sa isa ka kamalig sa Hacienda Robles, Barangay Guintubhan sa banwa sang Isabela, Negros Occidental, takna las 6:30 sang gab-i, Domingo nga adlaw, Mayo 2.
Ang biktima nga si Ryan Sta. Ana, 28-anyos, ang gindala pa sa Ignacio Lacson Arroyo Memorial District Hospital apang ini ang ginbawian sang kabuhi takna las 11:45 sang Domingo sang gab-i, suno kay Police Senior Master Sgt. Roberto Ballon Jr., case investigator sang Isabela Police Station.
Sandig sa imbestigasyon sang kapulisan, naga inom-inom si Ryan upod ang iya abyan sa payag sang ang duha ka suspetsado nga sanday Jimmy Sumagaysay, 52-anyos kag ang iya hinablos nga si Arvin Sumagaysay, 30-anyos, ang nag-abot.
Gulpi lang nag-gabot sang armas si Jimmy kag gintiro si Ryan, suno kay Ballon.
May igo sang luthang si Ryan sa iya nga nawala nga paa kag ulo.
Ginakabig man nga suspetsado si Arvin bangud ginahibalo pa ang iya partisipasyon sa krimen. Ini bangud suno sa witness, matapos sang isa ka lupok, ginkasa pa gid ang armas luthang kag may nabatian ini nga ikaduha nga lupok, samtang nagadalagan ang witness sa katubuhan.
Naghambal pa si Arvin sa kay Jimmy nga “indi na siya ya (witness),” nga nagapatimaan nga si Ryan ang ila target.
Ginpapat-ud pa sa karon ang motibo sang krimen.*
