Gina-alegar nga nagagamit sang iligal nga druga ang 37-anyos nga manugbulkit nga naghikog-patay sa iya gina-istaran sa vulcanizing shop nga iya gina-obrahan sa bangga sang 3rd road sa Circumferential Road, Barangay Taculing, siudad sang Bacolod subong nga aga sang Lunes, Setyembre 18, 2023.
Nahibaluan nga ang biktima ang tumandok sang Luzon apang temporaryo nga naga-istar sa siudad sang Bacolod kag may 15-anyos ini nga live-in partner.
Sa interview sang Radyo Bandera sa live-in partner sang biktima nga si alyas ‘Kayla’, antes siya magtulog pasado las 9 kagab-i, nag inom pa ang biktima upod ang iya amay.
Bangud sa kalapyo, natulugan siya kag iya na lamang natalupangdan pasado las 2 kaina sang kaagahon nga nagabitay na ang biktima sa balayan gamit ang pisi.
Suno kay Kayla, masami sila nagabaisanay sang biktima bangud nagapangimon ini kun may lalaki nga nagapalapit sa iya. Dugang pa sang biktima, kun kada nagabaisanay sila nga duha, masami nga nagahambal ang biktima nga magahikog siya.
Pahayag ni Kayla, magluwas nga nakainom sang makahulubog nga ilimnon nakita niya man nga nagagamit sang iligal nga druga ang iya live-in partner.
Gindugang pa sini nga nakakas sa anay gin-obrahan ang biktima bangud nagpositibo ini sa iligal nga druga.
Nahibaluan nga ikatatlo na nga live-in partner sang biktima si Kayla kun sa diin may una ini nga asawa sa Hinobaan kag tatlo ka mga kabataan, samtang may apat naman ini ka mga kabataan sa iya ikaduha nga nangin live-in partner.
Sa interview naman sang Radyo Bandera sa tag-iya sang Vulcanizing shop nga si Bonford Jaunites, iya ginpahayag nga isa pa lamang ka bulan nga naga-obra sa iya ang biktima.
Bangud sa kaluoy, ginpahimuan niya sang kwarto ang mag-asawa para may istaran ang mga ini kag indi nga sila magrenta.
Wala naman mag-ekspektar si Juanites nga nagagamit ang biktima nga gin-refer lamang sa iya sang tiyo sang babayi nga iya anay nga manugbulkit.
Sa pagtaliwan ni Perez, iya ginbilin sa iya 15-anyos nga live-in partner ang ila 3 ka bulan nga bata.
Nagahilibion naman si Kayla sa natabo sa iya partner kag nagaproblema karon kun paano padakuon ang iya bata bangud wala sang obra ang iya mga ginikanan.
Sa karon yara na sa Funeraria de Lourdes ang bangkay sang biktima. Samtang, wala naman sang may nakakita nga senyales sang “foul play” ang mga kapulisan.*
