Base sa datus nga gin release sang Department of Health okon DOH, nagsaka na sa 340,031 ka mga persona sa bilog nga Pilipinas, ang apektado sang acute respiratory infection.
Na record ang nasambit nga kaso sa sulod sang anum ka bulan, sini nga tuig 2022.
Sa mga indibidwal nga infected, mas madamu ang mga babaye nga nagpositibo sa acute respiratory infection kumparar sa mga lalaki.
Suno sa DOH, 177,946 ang babaye nga positibo sa nasambit nga impeksyon samtang 162,085 ang mga lalaki.
Madamu man sang mga kabataan nga nakaangkon sang acute respiratory infection sa Pilipinas nga naga edad sang isa tubtub apat ka tuig.
Base sa record sang health department, nagsaka na sa 92,350 ka mga kabataan sa nasambit nga “age group” ang apektado sa diin 47,129 ang mga lalaki kag 45,221 ang mga babaye.
Apektado man sang impeksyon ang 48,225 ka mga kabataan nga naga edad sang lima tubtub siyam ka tuig.
Sa mga lapsag naman nga naga edad sang 29 diyas tubtub 11 ka bulan, nagsaka sa 39,070 ang apektado, sa diin 20, 110 diri ang mga lalaki kag 18,960 ang mga babaye.
Yari ang mga lugar okon rehiyon sa Pilipinas nga may madamu nga kaso sang acute respiratory failure:
Central Luzon -134,113
Calabarzon (Cavite, Laguna, Batangas, Rizal and Quezon) – 49,487
The Cordilleras – 42,924 cases
Cagayan Valley – 31,479 cases
Gintumod sang Department of Health (DOH) ang makahalalit nga epekto sang “fossil fuel”, bilang isa sa mga nagapanguna nga ginatunaan sang “respiratory illness” sa mga Filipino.
Ang respiratory infection, amo ang sahi sang impeksyon nga naga apekto sa respiratory system sang tawo.
Imbolbado diri ang baga kag tanan nga gina-agyan sang hangin nga ginalakipan sang ilong, trachea, tutunlan kag iban pa.
