BACOLOD CITY – Nakakumpiskar sang kapin 85 gramos ukon P578,000 nga balor sang suspected shabu ang kapulisan sa Purok Sigay, Barangay 2 sa syudad sang Bacolod, sandig sa report sang Bacolod City Police Office.
Ginpatigayon ang buy-bust operation takna las 3:53 sang hapon, Sabado, Marso 25, 2023.
Dakup ang duha ka mga ginakabig High Value Individuals nga sanday Julianna Marie Sablon, alyas “Tumboy,” 22-anyos, isa ka estudyante kag Annabelle Diaz, alyas “Mabel,” 63-anyos, jobless, pareho residente sang nasambit nga lugar.
Gin-alegar nga nagbaligya sa police poseur-buyer sang isa ka sachet sang “shabu” sanday Sablon kag Diaz kabaylo sang P12,500 nga buy-bust money.
Magluwas sa buy-bust item, nakuha kay Diaz ang marked money, samtang 16 ka heat-sealed transparent plastic sachets sang suspected shabu ang narekober kay Sablon.
May nakuha man nga duha ka cellular phone, P1,020 nga cash kag pila pa ka non-drugs item.
Nakahunong karon sa custodial facility sang Police Station 2 sanday Sablon kag Diaz.*
