Yara na sa paghinakop sang Police Station 8 sanday Christian “Dondon” Tulot kag alyas Joel nga may kahilabtanan sa pagpatay sa magpamilya sa Gardenville Subdivision, Barangay Tangub.
Kaina sang aga, nag-aku si Dondon nga may kahilabtanan siya sa krimen kag gintudlo pagid nga kaupod niya amo sanday alyas Joel kag alyas Bro.
STATEMENT NI DONDON:
Sadtong Domingo nga adlaw, yara sa kubo-kubo sanday Joel, Bro kag Michael nga nagalalisay alas 8:00 sang aga, suno kay Dondon.
Paglalisay, gin-uyatan ni Joel si Michael kag ginlamposan ini sang martilyo ni Bro.
Wala pa nakontento, kag ginlabo ni Joel si Michael sang espading.
Nakita ni Gemma ang ginhimo nanday Joel kag Bro kay Michael kag hinali man nila ini ginpatay gamit man ang martilyo.
Nakabulig man sa krimen si Dondon matapos sini ginhakos si Gemma para indi makagiyo samtang ginalampusan sang martilyo ni Bro.
Tubtob nga ginpatay naman nila si Jocelyn.
Dugang pa ni Dondon nga buhi pa ang bata sang naglakat siya sang makadali bangod sa natabo kag nabilin si Joel kag Bro sa balay.
Ginabulubanta Alas 11:00 sang aga, nagbalik si Dondon sa balay kag nakita nga ginpatay naman ang bata.
DROGA:
Suno kay Police Major Joery Puerto, station commander sang Police Station 8 nga si Michael ang nagacontact kay alyas Bro angot sa iligal nga droga.
Si Dondon ang naga-upod kay Michael nga nagabakal sang droga kay Bro kag nagagamit man ini.
Sa inisyal nga imbestigasyon, posible rason sa paglalisanay ang utang ni Michael kay Bro sa iligal nga droga.
ADMISSION:
Kaina sang aga, ginpalayag ni Police Major Joery Puerto, Station Commander sang Police Station 8 nga gin-aku ni Dondon nga isa siya sa may kahilabtanan sa pagpatay sa tiya nga si Jocelyn Espinosa Nombre, 60 anyos kag Gemma Espinosa, 65 anyos; pakaisa nga si Michael Espinosa kag hinablos nga si Precious, 6 anyos.
Matapos gintudlo ni Dondon nga kaupod niya si Joel sa krimen, gin-imbitar sang kapulisan si Joel Espinosa, utod sang mga biktima nga sanday Jocelyn kag Gemma.
Kag ang ikatatlo nga ginatudlo nga suspek amo si alyas “Bro”.
Ginpaidalom kagab-e si Dondon sa Drug testing kag ginahulat pa sa karon ang resulta.
Una naman nga igapasaka nga kaso batok kay Dondon ang paglapas sa Republic Act 9165 ukon ang Comprehensive Dangerous Drugs Act of 2002 matapos ini makuhaan sang iligal nga droga.
Padayon pa sa karon ang interrogation kay Joel matapos nga wala pa ini nakahatag sang iya nga bahin.
