Pilason ang isa ka 17- anyos nga lalaki matapos ini ginbuno sa iya tyan kag likod samtang nagapakig-istorya sa iya nobya sa Hacienda Amanda, Barangay 8 sa syudad sang Victorias, Negros Occidental, takna las 10:30 sang gab-i, Lunes, Disyembre 12, 2022.
Ang duha ka mga suspek ang gulpi lang nag-abot sa lugar, ginbuno ang menor de edad gamit ang matalom nga bagay kag nalagyo, suno sa spot report nga ginpadala sa Negros Occidental Police Provincial Office.
Wala naman maano ang nobya sini.
Gindala ang menor de edad sa Victorias Emergency Clinic apang ginsaylo man sa Corazon Locsin Montelibano Memorial Regional Hospital sa syudad sang Bacolod.
Ginkilala ang isa sa mga suspek kay Jomer Sison samtang unidentified pa isa ka suspek nga iya upod sa krimen. Pareho nga yara na sa legal nga pang-edaron ang mga suspek kag ini sila ang residente sang Barangay 8, suno sa kapulisan.*
Note: Wala ginhingadlan ang biktima bangud ini isa ka menor de edad.*
