BACOLOD CITY– Ginkumpirmar ni Provincial Legal Officer Atty. Alberto Nellas Jr. nga mahimo pa nga mag-apelar sa Civil Service Commission (CSC) Region 6 ang apat ka mga empleyado sang Office of the Provincial Agriculturist nga ginpangkakas sa serbisyo may angut sa kaso nga grave misconduct bangud sa pag-inom sa sulod sang ilimnan samtang yara sa isa ka official travel sa siudad sang Victorias.
Dugang pa ni Atty. Nellas mahimo man nila nga mag-file sang Motion for Reconsideration sa talatapan ni Governor Eugenio Jose Lacson bilang amo ang disciplining officer.
Sa interview sang mga katapo sang media kahapon kay Atty. Nellas iya ginpahayag nga ginhatagan sang 15 diyas ang nasambit nga mga empleyado agud mag-sumiter sang ila tagsa-tagsa ka mga “appeals”.
Madumduman nga ginserbe sang PLO ang desisyon batok sa apat ka mga empleyado sadtong tinalikdan nga Enero 4, 2023.
Samtang ginpahayag man ni Atty. Nellas nga ginahulat pa karon sang Kapitolyo kun ano ang tikang nga pagahimu-on sang mga ginpangkakas nga mga empleyado nga sanday Engr. German Abihay, Engr. Ramelo Letran, Engr. Rezin Palacios kag Maria Luisa Abano.*