Makakaon kag makainom na sang gatas ang mga malnourished nga mga kabataan sa Pilipinas!
Suno sa Department of Budget and Management okon DBM, 3.7 bilyones ka pesos ang gin-aman sang gobyerno para sa Department of Social Welfare and Development okon DSWD.
Pagagamiton ang nasambit nga kantidad sa feeding program kag distribusyon sang gatas para sa mga “malnourished” okon kulang sa nutrisyon nga mga kabataan sa pungsod.
Kapin sa 1.8 milyones ka mga kabataan ang makabenepisyo sa regular nga feeding program samtang 157,968 naman ka mga “malnourished” nga mga kabataan ang makabenepisyo sa “milk feeding program”.
Mangin lead agency naman ang DSWD sa implementasyon sang Supplementary Feeding Program (SFP) para sa mga “undernourished” nga mga kabataan nga naga edad sang tatlo tubtub lima ka tuig.
Sang tinalikdan nga tuig, 1,685,170 ka mga kabataan ang nahatagan sang “nourishment” pinaagi sa SFP, suno sa DBM.
