Lalaki nga most wanted person sang Isulan Municipal Police Station sa Sultan Kudarat ang gindakup sa Gold Crest Subdivision sa Barangay Bata, ciudad sang Bacolod, sang Lunes, Abril 26, 2021.
Ginkilala ang akusado nga si Jesuhua Pico, alyas “Jeje/Pico,” 26-anyos, kag residente sang Barangay Bata.
Si Pico ang ginakabig man nga High Value Individual sang Philippine Drug Enforcement Agency kag yara sa priority ten target list sang ahensya.
May pending warrant of arrest si Pico sa kaso nga pagbaligya sang iligal nga droga ukon Section 5 sang Republic Act 9165 ukon Comprehensive Dangerous Drugs Act of 2002.
Wala sang recommended bailbond nga gin-rekomendar si Judge Lorenzo Balo, sang Regional Trial Court, Branch 19 sang Isulan, Sultan Kudarat sang Oktubre 2, 2020.
Nakahunong karon sa Station 3 si Pico.*
