Ginpasaka sang Philippine National Police-Criminal Investigation and Detection Group (PNP-CIDG) sa Department of Justice (DOJ) ang multiple murder complaint batok kay Congressman Arnolfo Teves Jr. (Negros Oriental, 3rd District) kag lima ka iban pa nga mga persona may angut sa 2019 killings nga nagluntad sa Negros Oriental.
Base sa complaint sheet, ginpasakaan sang kaso si Cong. Teves kag Hannah Mae para sa three counts sang murder samtang sanday Richard Cuadra, Rolando Pinili kag Jasper Tanasan ang ginpasakaan sang two counts of murder, kag si Alex Mayagma ang may one count of murder.
Si Cong. Teves kag iban pa ang ginatudlo nga suspek sa pagpatay kay anay councilor Miguel Lopez Dungog sadtong Marso 25, 2019 sa siudad sang Dumaguete kag duha pa gid ka mga persona sadtong Mayo 26, 2019 sa Sitio Labugon, Barangay Nago-alao, Basay, Negros Oriental.
Dugang pa, ginatudlo man sila sa pagpatay sa isa ka persona sadtong Hunyo 23, 2019 sa Barangay Malabugas, Negros Oriental.
Suno sa abogado nga si Levito Baligod, gin-base nila ang complaint sa affidavit sang isa ka gunman nga nag-ako sa PNP-CIDG.
“Nag-file ang pamilya at ang CIDG against Cong. Arnolfo Teves for killings that were perpetrated way back in 2019. Ang witnesses po ay ‘yung mga tao na kasama sa pagpatay. Ito ‘yung mga assassination team na nag-execute ng affidavit,” suno kay Baligod.
Ginklaro naman ni Baligod ang pagpasaka sang kaso ang wala sang kahilabtanan sa nagapadayon nga imbestigasyon may angut sa pagpatay kay Negros Oriental Governor Roel Degamo kag iban pa.
Madumduman nga ang pamilya Degamo kag Teves ang ginakabig nga political rivals sang probinsya.*
